prosody | miscellaneous |
Amicx Guigo, be-m asaut de ton sen, Car de mestiers vols apenre cals so! Que trotiers fus una longa sazo! Pueis auzi dir que pugiest a siruen, Qu'enblauas buous, bocxs, fedas e moutos! Pueys fus ioglars de dir vers e chansos! Ar iest poiatz a maior onramen, Que-l conzs n'a fag cauaier saluatie. E can iras, Guigo, cridar la gen, Gelozia cridaras per Meisso, E cobeitat per lo duc de Torcho E Miullon per parlar sotilmen, E per beure sel cuy es Cortesos, E per engan cel de cui es Salos, E cridaras Lunel per sobresen, E Castelnou per ceb' e per formatie. Aiso crida, Guigo, totas sazos, Tro que crides: proeza per los pros Caualier layt, trop es de donar len A foc, a foc, per restaurar paratie. Si crit, Bertrans, per cels que son valen, No-m cal cridar per vos Alamano, Qu'ieu vey tot l'an ses honor e ses pro C'anatz la cort de Proensa seguen! E non es faytz per vos condutz ni dos, Pero de motz vernassalhs, enueios No sap nulhs homs mielhs de vos far paruen, E ia per me non perdatz vostr' uzatie. Vostre frayre, Bertram, al partimen Parti e pres per que-l ten hom per pro: Qu'el pres tot co que tanh ad home bo E layset vos tot co c'om maluat pren! Qu'el vos layset de tota valor blos, Mal vos laisset et tot be vos secos: Gran maluestat ab croy captenemen, E gran cors flac farsit d'auol coratie. Qi qe crit proeza per los pros, Eu cridarai auolessa per uos . . . . . . . . . . . . . . . . . . . . E cridarai flaqesa e uolpilatge. |