| |
|||
| prosody | miscellaneous |
Nuls hom non deu eser meraveilaz S'eu non sui gai ni zant alegramen, Car Deu e cilh a cui me sui donaz M'an trait de ioi e mis en pensamen: Ilh, car mi te in desesperamen, E Deus, car es trop mis en sa 'speransa! E pois ambdos me donan malenansa, Ben a grant tort s'om zamais mi repren S'en perd mon zan, pois ai perdut mon sen. Si anc a Deu pris d'ome pietaz, Per merzel prec q'il m'ai'in zausimen E·m renda·l ioi dun sui per el raubaz, Car el meteus diz c'om a salvamen Non pot venir, se so que tol no ren! E pois el ten de tot ren la balansa, Tornar mi deu per dreiz en benenansa: Se non o fai, son diz mezeis desmen, Don naisera gran eror illa jen Estat avem compagnon lonzamen, Amic Sordel, de ioi e d'alegransa, Mas ar m'a Deu mis en tan gran eransa Qes compaygna cenz qe·m partra·m breumen, Si·n breu lo ioi qe Deus m'a tolt no·m ren. Beguinages—e Deu, car lo consen— A·m faiz e·m fai peiz de mort per un cen. |
Metrical pattern: 326