home page ?


S'ieu agues uirat l'escut
Vas lei qe tan m'a dit no,
D'autra part fera mon pro
O ill m'agra retengut.
Mas aisso-m teing a non sen
Qe tan tem son chausimen!
Q'eu sai qe be no-m faria!
Pero no-m sobra feunia,
Qe ia per re la pogues oblidar!
Qe fols no-s pot de folia laissar.

Cel iorn m'agui decebut
Qam me mis en sa preso!
Qe meillz me fos q'en greillo
M'aguessen mes li Masmut!
Q'eu n'eissira ben e gen
Ab amics o ab argen
O eu m'en fugira un dia!
Mas sai fugir non poria,
Ni hai amic qe m'en posc' aiudar,
Ni eu meteis no m'en sai conseillar.

Dompna, e-us am, e-us amaria
Dos tanz, si bes m'en uenia!
Mas qar sabez q'eu no-us posc desamar,
Mi faitz orgoill, qar eu non lo posc far.