| |
|||
| prosody | miscellaneous |
Gent es, mentr'om n'a lezer, S'enans de son mielhs a faire, Que, quan s'aizina-l cuidaire, Tal hor'es larcs de voler, E qui enans es avertitz Que l'aguaitz li sia yssitz, Non es ges del tot muzaire. Contr' aso deu aparer En cuy sens es alberguaire, Que sciensa no pretz guaire S'als ops non la vey valer! Doncs ar er de mi sentitz Lo sabers don suy tequitz, S'er fis o mesclatz de vaire. Qu'el segl'ai fag mon plazer Tan qu'en suy de trop peccaire, Et ar agrada-m n'estraire, Pus Dieus pro-m n'a dat lezer! Qu'esser pot hom descauzitz E non es ops n'an delitz Per oltracujat vejaire! Pueys Dieus so-m laissa vezer En que puesc esser miraire De mo mielhs e-l sordeis raire. Hon om plus a de saber, Hon maier sens l'es quesitz, Et aquelh par plus falhitz Qu'a sos ops n'es enguanaire. Mas s'ieu en saubes lo ver Be sai, for' ancar compaire De ioven et enquistaire. Sil ric, cuy degra chazer En grat, fan vis esbauditz, Mas si-l fals segl'es mestitz Que-il fait son pauc contra-l braire. E mentr'usquecs pot querer Luy qu'es vers Dieus e salvaire Mout es endreg si bauzaire, Pus o met en nonchaler! Que mager gratz n'es cobitz Qui fer s'escolp que feritz, D'aitan suy ben esperaire. So fera plus a temer, Per que suy meravilhaire Qu'hom non es Dieu reguardaire, Tro qu'es tan prosmatz al ser Que-l iornals l'es escurzitz! E s'adoncx no-l ven complitz Non cug que pueys se n'esclaire. Amors, be-m degra doler, Si negus autr'enginhaire Mas lo dreituriers iutiaire De vos me pogues mover! Que per vos er'enriquitz, Essaussatz et enantitz E pel senhor de Belcaire. Mas so non pot remaner, Cortez'amors de bon aire, Don mi lais esser amaire, Tan m'agrada a tener Lai on vol sanhs esperitz! E pueys el mezeys m'es guitz, No-us pes s'ab vos non repaire. Qu' ieu sai, tan rics governaire No-m denhes en guit aver --Peire d'Alvernhe so ditz-- No de-us for'enquer partitz Ni per autr'amor camiaire. |