prosody | miscellaneous |
Sobre-l vieill trobar e-l novel Vueill mostrar mon sen als sabens, Qu'entendon be aquels c'a venir so C'anc tro per me no fo faitz vers entiers! E qui non cre qu'ieu sia verdadiers Auja dese con estau a razo. Qu'ieu tenh l'us e-l pan e-l coutel De que-m platz apanar las gens! Que d'est mestier an levat en pairo, Ses acordier que no-s rompa-l semdiers, Qu'ieu dic que nier mi mostr'els faitz non niers, Qu'a fol parlier ten hom lui e-l sermo. C'a un tenen ses mot borrel Deu de dir esser avinens! Quar qui trassaill de M-ari en Mi-ro, Entre-l mieg faill si no-s pren als ladriers! Com del trebaill quecs motz fatz messatgiers Qu'en devinaill met l'auzir de maizo. E qui qu'en frima ni-n fragel, Pos qu'es mos trobars tan valens .................. Q'ieu soi raitz e dic qu'ieu soi premiers De digz complitz, vensen mos fatz guerriers, Que-m levon critz que ieu no m'en tenh pro. Donx com qu'ill sion d'un tropel Menton tot gent er per las dens, Qu'ie-m sen sertas del mieils qu'es e que fo, Enseguras de mon chant e sobriers Ves los bauzas, e sai que dic, qu'estiers No vengra-l gras don a trop en sazo. Quar er m'abelis e m'es bel Qu'el mieu ioi s'enant la iovens! E s'ieu ren dic que lur an enviro, Aisi me'n gic, c'uns gaugz mi creis dobliers D'un dous espic qu'es ioios consiriers, Don m'an amic hueimais li mal e-ill bo. D'aisi-m sent ric per bona sospeiso Qu'en ioi m'afic e m'estau volentiers, Et ab ioi pic e gaug mos deziriers Et ab ioi pic e gaug vueill: Dieus lo-m do. |