prosody | miscellaneous |
Dieus, vera vida, verais E dreitz endrech clers e lais, E nomnatz salvaire Cristz En latin e sobr' ebrais, E natz e pois mortz vius vistz E sorsetz, don laissetz tristz Aquels que pois fezetz gauzens! Seigner reis, eu failli fals, Don es issitz tant grans mals, En consir et en ditz durs, Et en fols faitz enfernals Ab brondis d'estrains aturs, Et en tals talens tafurs: Mi-us rend colpables penedens. De tot so q'ieu fesi anc, E si non ai cor ferm franc De dir so que-m agra ops, Prec a vos al cal me-n planc, Per cui tant fon fizels Iops, Que non gardetz mos tortz trops, Ma gratia-m sia sofrens. Q'ieu no-m sent si savis sai Que posca conqerre lai Lo reing on hom set ni fam Ni freig non a ni esmai, Si-ll vostra vertuz, cui clam, No-m don'esfortz q'ieu desam Lo ioi d'aqest segle giquens. Qe-m fai faillir vas vos sol, Per que-l cors m'intr'en tremol! E si-m servatz mos forfaitz Tro lai al derrier tribol Q'enans no-ls m'aiatz fag fraitz, Seigner, ges bons no-m n'es plaitz, Si doncs merces no-ls sobrevens De vos, q'estorsetz Sydrac D'ardent la flam'e Misac Ensems et Abdenago E Daniel dinz del lac E Ionas ab utero E-lz tres rics reis contr'Ero E Susann' entre-ls fals guirens! E paguetz, Seigner sobrans, Tanz de dos peis e cinc pans, E-l Lazer suscitetz vos Q'era ia quatredians! De vos ac per bel respos Son serf salv Centurios, E gitetz del mon mains turmens! E fesetz de l'aiga vin Al covit d'Archeteclin, Ed autres meravills moutz, Don hom carnals non sap fin Ni no-s n'entremet' estoutz! E parlet per vos lo voutz De Lucha, rics reis resplandens! E fezetz la terra e-l tron E tot qant es ni anc fon D'un sol seing el sol el cel, E confondetz Faraon, E detz als fills d'Israel Laich e brescha, mann' e mel, E dampnetz per serpen serpens! C'als vostres fon requies, Qand vos plac que Moyses Encausses lai el desert! E solsetz las mans e-ls pes, Quand us angels l'ac espert, Saint Peire e-l fezetz cert Dels vostres destrics destreignens! E-us quesiron la lor pleps Tro lai on es mons Oreps, Aucien dinz Bethleem, Qan vos en fugi Ioseps En Egipte, so sabem! E pois en Iherusalem Venguetz, e-ntre-ls vostres parens A Nazareth, reis Ihesus. Pair' en tres personas us E fills e sainz esperitz, Ador en trinitat sus Q'etz cims e rams e razitz E deus e de qant q'es guitz: Siatz me, si-us platz, defendens. E sai obr' e bon talan Mi detz e far entretan Que, qan venretz en las nius Iutgar lo segl' el iorn gran, Doutz Dieus, no-m siatz esquius E q'ieu, clars reis regum pius, M'en an ab los gausitz gauzens. E, Seigner, no-m oblidetz gens, Que ses vos non sui sostenens! E seing m'en vostre nom crezens: In nomine patris e filii et spiritus sancti. amen. |