home page ?


Lo gens tems de pascor
Ab la frescha verdor
Nos adui folh' e flor
De diversa color,
Per que tuih amador
Son gai e chantador
Mas eu, que planh e plor,
C'us jois no m'a sabor .

A totz me clam , senhor
De midons e d'Amor,
C'aicist dui traidor,
Car me fiav'en lor,
Me fan viur' a dolor
Per ben e per onor
C'ai faih a la gensor,
Que no.m val ni.m acor.

Pen' e dolor e dan
N'ai agut, e n'ai gran,
Mas sofert o ai tan .
No m'o tenh ad afan!
C'anc no vitz nulh aman,
Melhs ames ses enjan,
Qu'eu no.m vau ges chamjan
Si com las domnas fan .

Pois fom amdui efan,
L'am ades e la blan !
E.s vai m'amors doblan
A chascu jorn del an.
E si no.m fai enan
Amor e bel semblan,
Cant er velha, .m deman
Que l'aya bo talan .

Las e viure que.m val,
S'eu no vei a jornal
Mo fi joi natural
En leih, sotz fenestral,
Cors blanc tot atretal
Com la neus a nadal,
Si c'amdui cominal
Mesurem s'em egal

Anc no vitz drut leyal,
Sordeis o aya sal,
Qu'eu l'am d'amor coral,
Ela.m ditz :no m'en chal.
Enans ditz que per al
No m'a ira mortal .
E si d'aisso.m vol mal,
Pechat n'a criminal.

Be for'oimais sazos,
Bela domna e pros,
Que.m fos datz a rescos
En baizan guizardos,
Si ja per als no fos,
Mas car sui enveyos,
C'us bes val d'autres dos,
Can per fors' es faihz dos .

Can vei vostras faissos
E.ls bels olhs amoros,
Be.m meravilh de vos
Com etz de mal respos.
E sembla.m trassios,
Can om par francs e bos
E pois es orgolhos
Lai on es poderos.

Bel Vezer, si no fos
Mos enans totz en vos ,
Laissat agra chansos
Per mal dels enoyos.