| |
|||
| prosody | miscellaneous |
Can par la flors josta·l vert folh E vei lo tems clar e sere E·l doutz chans dels auzels pel brolh M'adousa lo cor e·m reve, Pos l'auzel chanton a lor fòr, Eu, c'ai mais de joi en mo còr, Dei be chantar, pois tuih li mei jornal Son joi e chan, qu'eu no pes de ren al. Cela del mon qued eu plus volh, E mais l'am de cor e de fe, Au de joi mos dihz e·ls acolh E mos precs escout' e rete. E s'om ja per ben amar mòr, Eu en morrai, qu'ins en mo còr Li port amor tan fin' e natural Que tuih son faus vas me li plus leyal. Be sai la noih, can me despolh, El leih qu'eu no dormirai re. Lo dormir pert, car eu lo·m tolh Per vos, domna, don me sove! Que lai on om a so tezòr, Vol om ades tener so còr . S'eu no vos vei, domna, don plus me cal, Negus vezers mo bel pesar no val. Can me membra com amar solh La fausa de mala merce, Sapchatz que tal ira me colh , Per pauc vius de joi no·m recre. Domna, per cui chan e demòr , Per la bocha·m feretz al còr D'un doutz baizar de fin' amor coral, Que·m torn en joi e·m get d'ira mortal. Tals n'i a qued an mais d'orgolh, Can grans jois ni grans bes lor ve! Mas eu sui de melhor escolh E plus francs, can Deus me fai be. C'ora qu'eu fos d'amor a l'òr, Eu sui de l'or vengutz al còr. Merce, domna non ai par ni engal. Res no·m sofranh, sol que Deus vos me sol. Domna, si no·us vezon mei olh, Be sapchatz que mos cors vos ve! E no·us dolhatz plus qu'eu me dolh. Qu'eu sai c'om vos destrenh per me. Mas, si·l gelos vos bat' de fòr, Gardatz qu'el no vos bat'al còr. Si'us fai enoi, e vos lui atretal, E ja ab vos no gazanh be per mal. Mo Bel-Vezer gart Deus d'ir' e de mal, S'eu sui de lonh, e de pres atretal Sol Deus midons e mo Bel-Vezer sal, Tot ai can volh, qu'eu no deman ren al. |
Metrical pattern: 382p
Play the original melodyCan't hear anything? Click here to download the original melody (MIDI).