prosody | miscellaneous |
Quan l'erb'es reverdezida Els pratz delonc lo vivier, E.l rossinhols brayl'e crida, E son florit li vergier, Adoncx par que.l temps s'esclaire, Quan hom las ranas au braire Pel maresc e per lo riu. Si ai amor encobida E mes tot mon cossirier Que ja no vuelh a ma vida, Mon grat, far autre mestier, Qu'anc, pus nasquey de ma maire, No volgui autr'obra faire Ni d'autre labor no viu. Mas ieu n'ay una chauzida Que no m'en fai desturbier, Mas be m'a sa fe plevida Et yeu jurat al mostier ...don no.m puesc estraire, Tan li suy fizels amaire Ses falhir, so.us jur e.us pliu. Dormit a, si no.s rissida, En oblit un an entier, E no.m pretz, s'illa m'oblida, Mais tot lo mon un denier. Ora la.m gar Sant Salvaire, Qu'om non la.m puesca sostraire Ni per autre no.m esquiu S'illa.m fai'n breu cossentida D'aquo dont ai dezirier, Qu'ieu la bays nud'o vestida, Ja autra ricor non quier. Assatz val mais qu'emperaire, Si desotz son mantel vayre Josta son belh cors m'aiziu. Blanch'e grayl'et escafida Es, ses coratge leugier, Douss'e fresqu'e colorida Cum flor de may en rozier, Corteza e de bon aire, E non suy de re guabaire, Qu'assatz n'es plus qu'ieu non diu. Una gancha trasaillida Me fon dig que.m fes l'autrier, S'es de bel mentir garnida Que mon ver fai mensongier. Los forfaitz, qu'ieu non pres gaire, No vueill auzir ni retraire C'om no m'aia per auriu. Car si.n fauc fol'esbrugida E trop gran vertat l'enquier, Si auran m'amor delida E vieillas e lauzengier. Qui.s vol, s'en fassa janglaire, Mas mi apel, quan repaire, Son bon amic senhoriu N'Eblon man ves Margarida Lo vers per un mesatgier, Qu'en lui es amor jauzida De don'e de cavalier. Et ieu soi sai ajustaire De dos amicx d'un vejaire, N'Aimes e.n l'Estrebesquiu. N'Aimes e.n l'Estrebeschaire Son dui amic d'un vejaire ...ab l'entrebeschiu. |