| |
|||
| prosody | miscellaneous |
D'aquel mestier que hom a, cal que sia, O d'aquel'art, lo vay le noms seguen, C'aysi n'a fach Dretz adhordenamen. Doncx qui foudat fay, per aital semblan, Dic yeu qu'es fols, c'aisi·l jutja Razos, Et er tracher sel que fay trassios, Et er layres aquel que vay emblan: Qui malvestat fay, nulhs hom non poiria Tolre lo nom del malvat sertamen, Per que fay bon renhar adrechamen. Per tu, Joan, que vey anar obran Malvayzamen, soi per sert cossiros! S'ieu dizia que savis iest e pros, Mos cors dira: Bertran, tu vas faulan, Que anc nulhs homs mays no fetz de fulia Ni d'auleza que Joans vay fazen En son alberc, prezen de tota gen. Qu'ab ta molher et ab tu va·s colcan E manj'e beu la femna d'un gibos: Tostemps devetz esser fort doloros, Caitieu, dolen de ta folia gran. A joc de datz o en bordelairia Te troba hom, cant hom te vay queren: Joan, per sert, mens vales de nien. Totz homs savis garda per adzenan, Doncx veyas y, e cals es tos ressos, E·l mal c'adutz fol'e vils messios! On non yray mon sirventes selan, Ans lo volrai ensenhar cascun dia A tot home per so c'an retrazen La malvestat del teu cors recrezen. Joan, car ieu t'ay amat ses bauzia E t'am encars, te vau aiso dizen, C'amicx non es qui non o fay parven. |