| |
|||
| prosody | miscellaneous |
Per que non es mas astr'e aventura So qu'esdeven, cant yeu be m'o cossir: Pero deu hom lo ben e-l mal grazir, Pus a Dieu plai no vengua per dreitura. Qu'ieu ai sufert dels mals d'Amors ganre, E adoncx mais can pus l'era lials, Mas d'aquels mals me son vengut mil be, Que cascus es bos e fis e cabals! Que ieu fera, per ma dezaventura, De grans foldatz, mas ilh m'en fai giquir! Aquest be n'ai et engenh et albir, Que ses Amor me feran gran fraitura. Per que no-m par, cant hom gen se capte, Amors peccatz, mas estiers es mortals, Car fin 'Amors tol al cobe lo fre E don' e serv e fai cortes los fals E-ls pecx sabens, que no-l plai foletura: Doncx, pus Amors sap tans bes far e dir, Si mals en ve, en patz se deu sufrir, Car ges tostems mala sazos non dura. Per c'om non deu mal d'Amor dir per re Car per assach dona trebalh als fals, Car els trebalhs pot hom vezer e ve Cals es soptes o es fis o venals: Que re tan be, per c'Amors y s'atura, Non pot hom mielhs manieyra prezumir Qu'en los trebalhs, per c'Amors fai marrir Los fols e-ls pecx can non segon mezura. Ab fin' Amor atroba hom merce, Ab que hom be y meta sos jornals, Mas er es temps c'om volria dese Esser amatz ses trebalhs e ses als: Non es aissi, c'Amors neta e pura Non deu leumens als amans cossentir, Car mais l'am'om e mais la vol servir Can sap esser en premier aspr'e dura. S'ieu ren vali ni trobi per natura, Plazen dona, a vos o deg grazir, Car de vos ai sen e jenh et albir, Per qu'ieu prec Dieu que.us don bon'aventura. Al pus valen que anc portes sentura, Chanso, t'en vai prezentar e formir, A mon senhor de Berra, cuy potz dir Qu'ieu sostenc chant com el fai valor pura, E qu'ieu li-m do per faire e per dir Tota cauza, sia frevol' o dura. |