home page ?


Lo coms m'a mandat e mogut
Per N'Araimon Luc d'Esparo
Q'ieu fassa per lui tal chansso
On sion trencat mil escut,
Elm et ausberc et alcoto,
E perpoing falsat e romput.

Et er l'ops que sia atendut,
Pois comtar mi fai sa razo,
E que ges non diga de no,
Dapois que m'o a covengut
Que blastimariant m'en Gasco,
Car de lor mi tenc per tengut.

A Tolosa part Montagut
Fermara·l coms son gomfano
El Prat Comtal costa·l Peiro;
E qand aura son trap tendut,
E nos lotjarem de viro
Tant que tres nuoitz i jairem nut.

E serau i ab nos vengut
Las poestatz e li baro
E li plus honrat compaigno
Del mon e li plus mentaugut
Que per aver, que per somo,
Que per precs s'i serant mogut.

E desse que serem vengut
Mesclar s'a·l torneis pel cambo,
E·ll Catalan e·ll d'Arago
Tombaran soven e menut,
Qe no·ls sostenran lor arso,
Tant grans colps los ferrem, nos drut.

E non pot esser remasut
Contra·l cel non volon tronco,
E que cendat e cisclato
E samit non sion romput,
Cordas e tendas e paisso
E trap e pavaillon tendut.

Lo reis q'a Tarascon perdut
E·l seigner de Mon-Albeo
Rotgiers, e·l fills Bernart Otho,
E lo coms Peire lor n'aiut
E·l coms de Fois ab Bernardo,
E·n Sans, fraire del rei vencut.

De lai pensson de garnizo,
Que de sai lor er atendut.

Totz temps vuoill que li aut baro
Sion entre lor irascut.