prosody | miscellaneous |
Pois Ventadorns e Comborns ab Segur E Torena e Monfortz ab Gordo Ant faich acort ab Peiregos e jur, E li borzes si claven de viro, M'es bel q'ieu chant e que m'en entremeta D'un sirventes per lor assegurar; Q'ieu non vuoill ges sia mia Toleta, Per q'ieu segur non i pogues estar. Ha! Puoig-Guillem e Clarent e Graignol E Saint-Estier, mout avetz grand honor, Et eu meteus, qui conoisser la·m vol, Et a sobrier Engolesmes, maior D'En Charretier que guerpis la charreta; Non a deniers ni no·n pren ses paor; Per qu'ab honor pretz mais pauca terreta Q'un gran empier tener ab desonor. Si·l rics vescoms que es caps de·ls Gascos, A cui s'aten Bearns e Gavardans, E·N Vezians si·s vol, e·N Bernardos, E·l seigner d'Aics e cel cui es Marsans, D'aqesta part aura pro·l coms que fassa; Et eissamens, aissi cum el es pros, Ab sa grand ost q'atrai e que amassa, Poie s'en sai et ajoste·is ab nos. Si Taillaborcs e Ponz e Lezinans E Malleos e Taunais fos en pes Et a Sivrac fos vescoms vius e sans, Ja non creirai que non nos ajudes; Cel de Toartz, pois lo coms lo menassa, Tenga s'ab nos, e non sia ges vans! E demandem li tro que dreich nos fassa Dels homenes qe·ns a traitz d'entre·ls mans. Entre Peitau e la Ysla-Bochart E Mirabel e Laudun e Chinon A Clarasvals ant bastit ses regart Un bel chaslar e mes en plan chambon; Mas non vuoill ges lo sapcha ni lo veia Lo reis joves, car no·il sabria bon; Mas paor ai, pois que tant fort blancheia, Q'el lo veira ben da Matafellon. Del rei Felip sabrem ben s'il paireia O s'il segra·l bon usatge Carlon D'en Taillafer, que per seignor l'autreia D'Engolesme don el l'en a fait don. E non es dreitz de rei qe ren autreia, Pos a dich d'oc, qe mais diga de non. |