| |
|||
| prosody | miscellaneous |
Ges no mi desconort, S'ieu ai perdut, Que non chant e·m deport E no m'aiut Con cobres Autafort Q'eu ai rendut, Al seignor de Niort Car l'a volgut. E puois e merceian Li sui vengutz denan, E·l coms en perdonan M'a retengut baisan; Ges no·i dei aver dan, Que qe·m disses antan, Ni lausengier non blan. Vas mi son perjurat Trei palazin E·l catre vescomtat De Lemozin, E li dui penchenat Peiregorzin, E li trei comte fat Engolmezin. E·N Sentols ab Gasto E tut l'autre baro Me feron plevizo E lo coms de Digo Ab lo comte breto E Raimons d'Avigno, Et anc uns no·m tenc pro. Ses pro tener amic Tenc per egal Com fas mon enemic Que no·m fai mal. Q'en un mostier antic De san Marsal Me jureron man ric Sobr'un missal. Tals me plevi sa fe Non fezes plag ses me, C'anc pois no m'en tenc re; E no·ill estet ges be Car se mes a merce E s'acordet ab se, So vos pliu per ma fe. Si·l coms m'es avinens E non avars, Mout li serai valens En sos affars E fis com us argens, Humils e cars. E·l coms fassa lo sens Que fai la mars: Quan res i chai de bo Vol que ab lei s'esto, E so que no·l te pro Gieta fors el sablo. Aisi taing de baro Que teigna so perdo E, s'el tol, que pois do. Lo comte voil pregar Que ma maiso Mi comant a gardar, O que la·m do; C'ades mi son avar Tut sist baro C'ab els non puosc estar Ses contenso. Ara mi pot cobrar Lo coms ses malestar Et ieu vas lui tornar, E servir et onrar; E non o volgui far Troc'al desamparar Sui venguz de N'Aimar. Domna ab cor avar De prometr'e de dar, Pois no·m voletz colgar, Donasses m'un baisar! Aissi·m podes ric far E mon dan restaurar, Si Dieus e Saings m'anpar. |