prosody | miscellaneous |
Cortz e gestas e joi d'amor Me solion far esbaudir E tener gai e chantador, Tro per lei cui dei obedir Mi fo mos chantars devedatz. E en la lei Era mos chans excomonjatz. Ara sui asoutz en amor, E veiretz anar e venir Chansos, pos a la bellasor Platz qe mon chant dei'acuillir. E m'onranza, s'es acordatz Son cors a drei, E no·i ac negun dels comtatz. Del pauc rei de Terra Maior Me platz, c'aisi·s vol enantir. C'oi mais lo tenran per seignor Seill que·ill devon son feu servir. Puois vencut los a vas Aratz, Ar es estei E cobre ses dretz daus totz latz. No·m tengatz per acusador Si·us voill c'uns rics l'autre azir, Car meill s'en poiran valvassor E castellan de lor jausir. Que plus es francs, larcs e privatz, Fe qu'eu vos dei, Rics hom ab guerra que ab patz. Ben sai que li malparlador, Quar voill de lor gillas ver dir, M'en appellaren soffridor, Car mi lais forsar ni baillir; Qe·ls dons que mes frair m'a juratz E fag autrei Vol retener l'autra meitatz. Puois non volen dreit ni amor Faire ni negun plait suffrir, Ges per lezerors d'obrador, S'ieu m'en podia revestir, Non dei esser malrasonatz. Que·ill fan plaidei Mantas vetz c'om no·ls n'a preiatz. Mas eu ai tant ensegnador Non sai, per Crist, lo meill chausir: Cant eu pren e tol la ricor D'aquels que no·m laissan garir, Dison que trop me sui cochatz. Car non guerrei, Ara dison qe sui malvatz. Papiol, e tu vai viatz Al Joune Rei! Diras que trop dormir no·m platz. En Oc-e-No ama mais patz, Ab fe lo crei, Que·l frair Joans deseretatz. |