home page ?


Pois lo gens terminis floritz
S'espandis jauzions e gais,
M'es vengut en cor que m'eslais
De far un novel sirventes
On sapchon li Aragones
C'ab mal agur,
D'aisso sion il tuich segur,
Sai venc lo reis, don es aunitz,
Esser soudadiers logaditz.

Sos bas paratges sobrissitz
Sai que fenira coma lais
E tornara lai don se trais:
A Meillau et en Carlades.
Qand qecs n'aura son dreich conques,
An s'en vas Sur!
Greu er que en mar no·l debur
L'aura, car tant es pauc arditz,
Flacs e vans e sojornaditz.

Proenssa pert, don es issitz,
Que son frair Sanson prezon mais;
Q'el non a soing mas que s'engrais
E beva per Rossillones
Don fo deseretatz Jaufres;
Q'a Vilamur,
En Tolsa·l tenon per prejur
Tuich cill ab cui s'era plevitz
Car los a per paor giquitz.

Lo reis cui es Castrasoritz
E ten de Toleta·l palais
Laus que mostre de sos eslais
Sai al fill del Barsalones,
Car per dreich sos malvatz hom es.
Del rei tafur
Pretz mais sa cort e son atur
Non fatz cella don fui trahitz
Lo jorn q'el fon per mi servitz.

Lo bons reis Garsia Ramitz
Cobrera, qan vida·il sofrais,
Aragon, qe·l monges l'estrais
E·l bons reis navars, cui dreitz es,
Cobrara·l ab sos Alaves,
Sol s'i atur.
Aitant cum aurs val plus d'azur,
Val mais e tant es plus complitz
Sos pretz que del rei apostitz.

Per cella de cui es maritz,
Per la bona reïna·m lais,
E des qe·m dis so don m'apais.
Berengiers de Besaudunes
Li retraisera, si·l plagues,
Mas tot rencur
Sos malvatz faitz, que son tafur,
Car per el fo mortz e trahitz,
Don es sos lignatges aunitz.

Mout trahi laich l'emperairitz
Cum fals reis perjurs e savais,
Qan pres a qintals et a fais
L'aver que Manuels trames,
E la rauba e tot l'arnes;
Pois ab cor dur,
Qan n'ac traich lo vert e·l madur,
El n'enviet per mar marritz
La dompn'e·ls Grecs q'el ac trahitz.