prosody | miscellaneous |
Fuilhetas, ges autres vergiers Non fai fuilhar mars ni febriers Mas vos, qe vos es trop cochat De montainha sai devailat Enanz qe granz cauz s'abata; Q'ieu ai ja vist albre fuilhat Qe·s cocha, pueis gels lo mata. Mas totz temps isses voluntiers De vostra terr' ab los primiers, Anz qe sia li flors el prat. E fatz comte de paupertat, Con vos e vostra'scata Ha tengut l'inverns enserrat, Q'anc uns no·n passet la lata. Fuilhetas, sias soudadiers N'Archimbaud, qi nasqet derriers, Qe l'autres o ha tot laissat De proez' e el gazainhat. E pos leu e gen barata E·l vei adreit ez alinhat, Lau q'en proeça s'abata. Na Tempre, vos est trop leugiers, E fatz o qoma esparviers Que·s laissa, qant ha randonat; Mas ieu, con sahus aficat, Des q'e la rota m'abata, Non auria·ls mil ans camiat Q'ieu sivals tot jorn no·i glata. Na Tempre, ges de Lieucata Non sui, anz o hai tot laissat Ez estauc a Damiata. |