| prosody | miscellaneous |
Anc no·s poc far maior anta Qan m'asòls Ni mi pres en dòls. E pueis ill so a enqèst, Midons ni·l plai qe m'esclava Ni qe·m lais, No m'es danz Si·lls autruis enfanz Colc'el mieu bressòl Q'ieu sui granz Fatz cors, e pos ill t'encanta Tu t'o còls! E fatz i qe fòls, Que de tot joi si devèst E de pretz se cura e lava. Per ja mais Le bobanz Remainha e·l mazanz, Q'ieu o vueilh, si·s vòl, Dos aitanz Se·l seinher de cui es Manta E Muròls S'es de prims tersòls Tornatz. Ab qe sai non rèst! Sieus seria, si·s n'anava Lai, Roais, Trevaganz, Alaps e Aranz E fera filhòl Dels Persanz. Vas mon Oc-e-No t'avanta, Papiòls, Qar sieus es Bristòls E Nortzecrentz e Suèst E Londres e Titagrava E Carais E Roanz, E Toars e Canz. Pos tot a qan vòl, Sai s'eslanz. Entre Dordoinha e Charanta Es trop mòls So·m dis n'Auriòls, Q'enquier no·i a ren conquèst. Et er l'anta si·s suava, Ni qe lais Benananz E gortz e tiranz Cels q'amar non sòl, E poissanz. Enaps e copas mazanta Et orçòls D'argen e pairòls, E sec ribiera e forèst, E sai tolli'e donava! No·s biais Dels affanz: Preisas e mazans, Gerras ab tribòl L'er ennanz. Bells-Seinher, truanz Seres, si no·us dòl Le mieus danz. Mariniers, enjanz Es q'amar destòl Als amanz. |
Metrical pattern: 764