home page ?


Ben grans avoleza intra
A n'Aesmar, entre la carn e l'ongla!
A i pres luec aiz'el cor, josta l'arma,
E malvestatz fer l'ades de sa verga.
E sembla mal lo bon perbost, son oncle,
En cui bos pretz pren per sojorn sa chambra.

N'Aemar fa lum en chambra
De seu ardent, qan per privat s'en intra
Q'anc re non tais al bon pretz de son oncle,
Qe cors e senz la pot partir per l'ongla.
Vist ages ieu mesurar d'una verga
Lo vas on fos lo cors qi destrui l'arma.

E non plaing lo cors ni l'arma,
Mas la terra on bos pretz perd sa chambra!
Qe n'Aemar l'a tant batut ab verga
E degitat de tot luec on el intra
Q'ab lui non pot metre ni pel ni ongla.
E.l bes fluris e miels gran'en son oncle.

Per bon e per ric ten l'oncle,
E.l neps es tals qe non val re for l'arma!
Crois es, volpils del cim tro bas en l'ongla,
E per totz luecs es sa cortz e sa chambra.
Ai, com savais es cel qi s'amor intra
De ren ab lui, q'es tochatz d'avol verga.

Be.m segnei ab bona verga,
Lo jorn q'ieu vinc al bon prebost, son oncle!
E s'ieu estes soven lai on el intra,
Ben n'agra mais de joi mos cors e m'arma!
Q'ab ferm voler met bon pres din sa chambra,
Et es ab lui aissi con carns et ongla.

Lai, vas mon Berart vir l'ongla,
Q'anc no.m batet ni.m feri de sa verga
Pretz ni joven, ni.l gitet de sa chambra,
E membra.m ben e son pair e son oncle.
S'ab ferm voler de tot bom pretz non s'arma
Plus perdutz es q'arma q'en enfern intra.

Sirventes faz per oncle e per ongla,
a n'Aesmar, per verga e per arma,
E al prebost, per chambra e per intra.

Note: this sirventes is modelled after Arnaut Daniel's "Lo ferm voler qu'el cor m'intra". It is, likewise, a sextain.

Play the original melody

Can't hear anything? Click here to download the original melody (MIDI).