| |
|||
| prosody | miscellaneous |
Ar ven la coindeta sazos Que aribaran nostras naus, E venra·l reis gaillartz e pros, C'anc lo reis Richartz non fo taus Adoncs veirem aur et argen despendre, Peirieiras far destrapar e destendre, Murs esfondrar, tors baissar e dissendre E·ls enemics encadenar e prendre. Ges no·m platz de nostres baros Q'ant faitz sagramens, non sai caus; Per so n'estaran vergoignos Cum lo lops q'al latz es enclaus, Qand nostre reis poira mest nos atendre; Q'estiers nuills d'els non s'en poira defendre, Anz dirant tuich: "Mi non pot hom mesprendre De nuill mal plaich, anz mi vuoil a vos rendre." Bella m'es preissa de blessos Cubertz e teins e blancs e blaus, D'entresseins e de gonfanos De diversas colors tretaus, Tendas e traps e rics pavaillons tendre, Lanssas frassar, escutz traucar e fendre Elmes brunitz, e colps donar e prendre ..................................... No·m platz compaigna de basclos Ni de las putanas venaus. Sacs d'esterlis e de moutos M'es laitz, qand son vengut de fraus. E mainadier escars deuria hom pendre, E ric homen, can son donar vol vendre. En dompn'escarsa no·is devri'hom entendre, Qe per aver pot plegar e destendre. Bo·m sap l'usatges q'a·l leos Q'a ren vencuda non es maus, Mas contr'orgoill es orgoillos. E·l reis non a baros aitaus, Anz, qan vezon que sos affars es mendre, Poigna chascus cossi·l puosca mesprendre. E no·us cujetz qu'eu fassa motz a vendre, Mas per ric bar deu hom |