| |
|||
| prosody | miscellaneous |
Guerr'e pantais veg et affan A mant baron malvaz, truan; Pauc m'es del dol e menz del dan, Per qe·m voill alegrar chantan, Quar ab joi vauc et ab joi pes, E pensamenz no m'enpacha Ni sabers no·m fai sofracha A far un novel serventes. Guerra·m platz, si tot guerra·m fan Amors e ma donna tot l'an, Quar de guerra vei trair'enan Cortz e domnei, solatz e chan; Guerra fai de vilan cortes, Per que·m platz gerra ben facha E·m platz qan la treva es fracha Dels esterlis e dels tornes. Esterlins e tornes camjan, Tollen e meten e donan Veirem dels dos reis anz d'un an Lo menz croi, segon mon semblan; Per so·l segner coms, ducs, marques N'a ben sa pegnora tracha, Mas metre lo fan per gacha, So·m diz om, Gascon et Engles. Ara para qui meillz poiran Soffrir los maltraitz ni·l mazan: Maint caval bai e maint feran, Maint escut, maint elm e maint bran, E maint colp ferrir demanes, Maint mur, mainta tor desfacha Veirem, mainta testa fracha, Maint chastel forsat e conques. Gen non crei Frances ses deman Tengan lo desirit que fan A tort a maint baron presan; Per que meravilha·m don gran Del seignor dels Aragones, Car a lor dan no destacha, Puois a lor s'a de sa pacha Desmandat lo coms, ducs, marques. Qui·s voilla n'aia mal o bes O enpacha o desenpacha O braz rotz o testa fracha, Que tant m'es dels mortz com dels pres. Gai mi ten una gaia res Avinenz, joves, ben facha, Et ai ab leis una pacha Com an Pisan ab Genoes. |