| prosody | miscellaneous |
Sel qui camja bon per meillor, Se·l mielz prent, ben deu mais valer. Qu'ieu ai cor e Dieus do·m poder Que tant serva al mielz et aor Que de l'ira e de la dolor O·m mes sil que·m degra valer Qui·m traït e cuget m'aucire Plaza·il que·m torn en bon esper. Q'enves mi no·is pot escondire C'al seu tort no·m dones lezer. Lemozin, ben vos deu plazer C'ara·us es vengutz Meilz-de-Be. Tant quant mars clau ni terra te Non a domna on puosca caber Lo bes qu'om pot en leis vezer! No·i a joi, qui de leis no·l te. Q'ella sap tan gen far e dire Tot so qu'a bon pretz aperte C'ab son joi fai los iratz rire; Tan avinentmen se capte. Aquesta vos dic que mante Pretz e joi, tant aman honor Joven e solatz et amor Et acuoill; don a e rete Grat de totz cels qui si conve; Per que tuit sei corteiador Parton d'enant lei ab desire, Tant lor a sos vezers sabor; C'om no la ve que non conssire C'anc de sos oilz non vi jensor. Et a·m covenguda s'amor Can volra cavaller aver; Que cel qui mais sabra valer Soffrira per entendedor. Et er ben malvatz qui non cor Al cors on hom met tant d'aver Que·l meillz c'om puosca el mon eslire Pot gazaingnar e conquerer, S'es larcs e adreitz e servire E sap far e dire plazer. Guillelme Bertram, fai saber Per tot aqest dir de part me. E qui pros er, esforzen se, Paubre e ric, segon poder, Q'ella volra son dig tener. Que cel on mais veira de be N'aura guierdo ses desdire ........................... Qu'en tal loc vol son joi assire ............................ Guillelm', a Torena vai dire A-N Bos qe·is captegna tan be C'om puosca d'uoi enan eslire Qe Amors de son joi l'estre. |