prosody | miscellaneous |
Dompna, puois de mi no·us cal E partit m'avetz de vos Senes totas ochaios, Non sai on m'enqeira, Que ja mais Non er per mi tant rics jais Cobratz; e si del semblan Non trob domna a mon talan Qe·m vailla vos q'ai perduda, Ja mais non vuoill aver druda. Pois no·us puosc trobar engal Que sia tant bella ni pros Ni sos rics cors tant joios, De tant bella tieira Ni tant gais, Ni sos rics pretz tant verais, Irai per tot agaran De chascuna un bel semblan Per far dompna soiseubuda, Troi vos me siatz renduda. Fresca color natural Pren, Bels-Cembelins, de vos E·l dolz esgart amoros; E fatz gran sobrieira Car r·i lais, Q'anc res de ben no·us sofrais. Midonz N'Aelis deman Son adreig parlar gaban; Qe·m don a midonz aiuda, Pois non er fada ni muda. De Chales la vescomtal Vuoill qe·m done ad estros La gola e·ls mans amdos. Pois tenc ma carrieira, No·m biais, Vas Rocacoart m'eslais Als pels N'Agnes, qe·m daran; Q'Iseutz, la dompna Tristan, Que fon per totz mentauguda, No·ls ac tant belz a saubuda. N'Audiartz, si be·m vol mal, Voill qe·m don de sas faissos, Qe·il estai gen liazos. E car es enteira, C'anc no·is frais S'amors ni·s vols en biais. A mo Mieills-de-Ben deman Son adreich nou cors prezan, De qe par a la veguda La fassa bon tener nuda. De na Faidida atretal Vuoill sas bellas denz en dos, L'acuillir e·l gen respos Don es presentieira Dinz son ais. Mos Bels-Miraills vuoill qe·m lais Sa gaieza e son garan, E car sap son benestan Far, don es reconoguda, E no s'en cambia ni·s muda. Bels-Seigner, eu no·us qier al Mas que fos tant cobeitos D'aqesta cum sui de vos; C'una lechadeira Amors nais, Don mos cors es tant lecais Q'am mais de vos lo deman Que autra tener baisan. Doncs midons per qe·m refuda, Pois sap que tant l'ai volguda Papiol, mon Aziman M'anaras dir en chantan C'amors es desconoguda Sai e d'aut bas cazeguda. |