prosody | miscellaneous |
No-m puesc mudar que no-m ressit, Pus l'aura freida venta e corr, Alques de joy, e per amor, E pel temps que vey amarzit, Qu'auzelhs non chanta em plaissat, Ni-l boscs non retin doussamen! Mas ieu ai tan lo cor jauzen, Qu'aissi-l prenc ont ylh l'an laissat. E pus l'iverns nos tol l'estat, E-l freg encaussa lo temps gen, Ben dey aver esbaudimen Ab lo gen chan qu'ai comensat. Qu'atretan val, cuy es aizit, Un petit de joy ab freydor, Cum longu' amistatz em pascor, Quan tug l'avol son replenit. Totz temps viuran li acropit E-l fals becut lauzenjador Que-s fan de domnas guardador, Per que-l effan son abordit. Aquist an paratge baissat Ab aquel lur dompneyamen! Mas qui-n pendia mil o cen, A dreg auria Dieus venjat. Ben sai qual son li enjanat, Qu'a per pauc non dic mon talen! Qu'a dreg son coguos e sufren Silh qui plus s'en fan veziat! Que donas e drut e marit, Tug volon esser amador. Si per aquo son peccador, Paucx n'i a que sion guerit. Ia non creirai que Dieus oblit Bon drut ni belh dompneyador, Si per autre peccat major Per colpable non l'a cauzit. Que-l mal e-l bo son tug jutgat E quasqus ha son jutgamen. Per tal seran a-l guerimen Li fals perdut e-l fin trobat. Al cor e a la voluntat Conoys Dieus home finamen, E si-l volers nos s'i cossen, Totas e tug em encolpat! Quar so que Dieus vol es gequit, E-l sobreplus reten paor, Si-l mals talans no vai alhor, E-l bons no reman sai que-ns guit. |