| |
|||
| prosody | miscellaneous |
Sitot m'ai pres un pauc de dan, Per tan no serai recrezens, Qu'ieu no m'alegre e non chan Mal grat dels janglos maldizens! Quar viu d'amor et ab luy renh, Que daus totz latz me li'e-m senh, Per qu'ieu totz temps la servirai, Que d'als no-m pens ni puesc ni-m plai, Qu'em poder m'a quon ac Andrieu: Dieu prec, no-n prenda dan tan grieu. Amors, mes m'avetz en afan, Quar suy ves vos obediens! E si-m layssatz morir aman, Atendretz mal mos covinens! E fai peccat qui-l sieu costrenh Ses naleg, ni ves luy si fenh! E lag es qui son do estray! Estrazetz lo-m, e non puesc may, E pogratz lo-m donar fort lieu, Pueys tengron li plus ric mon fieu. Beure-m fai ab l'enap Tristan Amors, e eisses los pimens, E si-n des a lieys, qu'ieu am tan, Obrera-n plus cortezamens, Quar sols suy sieus, sol mi destrenh. Per qu'ieu suy vengutz en dessenh, Per lieys de cuy suy e seray, E s'ylh begues, pus begut ay, D'eys lo piment que ai begut ieu, Veiayre-m fora fos ab Dieu. Amors mi fay semblar enfan, Qu'atretals es cum d'elhs mos sens, Qu'eras plor, eras ai ioy gran, Er suy iratz, er suy iauzens! Et ades enaissi-m captenh, Quar ai chauzit e non atenh. Mas ges per tan no-m recreirai Qu'ades non am, qu'enquer veirai Que mi dons mi tenra per sieu, Si tot no-m vol plus q'un romieu. La genser am, al mieu semblan, Qu'anc fos ni er de nullas gens, De qui suy, quez autra non blan, Per que l'auria ops cauzimens. Prec li, si-l platz, que-m vuelh'e-m denh, Qu'estiers art, e muer et estenh! E deu guardar si mortz m'eschay Quar ieu l'am ab fin cor veray, E s'o fa, merce n'aura lieu, Que peccat fai qui merma-l sieu. Ges forsatz no-m partray de lieu De vos, qu'am mais que ren sotz Dieu. |