| |
|||
| prosody | miscellaneous |
Ben ay' Amors, quar anc me fes chauzir Lieys que no-m vol ni-m denha ni m'acuelh! Quar si-m volgues aissi cum ieu la vuelh, Non agra pueys de que-m pogues servir: Precx e merces, chauzimens e paors, Chans e dompneys, sospirs, dezirs e plors Foran perdut, si fos acostumat Que engalmen fosson aman amat. Us joves cors complitz de gran beutat, Guais, amoros, cortes, de bon agrat, On es fis pretz renovelhatz e sors, M'a si conquis non puesc pensar alhors! Q'ieu non vau tan vas autra part ni-m vir, Qu'ades mon cor no tir lai e mey huelh! E s'ieu aisso li vet nulh temps ni-l tuelh, Ja fin' Amors no m'en fassa jauzir. Gaugz e plazers m'en ven on plus mi duelh, E suy pagatz, tan m'es bon a suffrir! Quar molt vuelh mays per lieys cui am languir, Qu'autra-m don so don ill me fai erguelh! Qu'ieu no vuelh ges aver quist ni trobat Dona que m'aya trop leu joi donat! Quar non es joys si non l'aduy honors, Ni es honors si non l'aduy Amors. S'Amors o vol, e-m fai Merces secors, Ieu serai tost gueritz de mas dolors E dels maltragz on ai lonc temps estat! Mas si-m destrenh Razos, e-m fier e-m bat Que tot quan pes me torna d'autre fuelh, Per folh mi tenh quar ja vuelh ni dezir So que no-s pot ni no-s deu avenir! E non per tan q'ieu remaing tals cum suelh. Ges de midons no-m pot Razos partir, Qu'ieu clam per Dieu e per humilitat! E si Razos trai, de lai, sas ricors, Ieu fatz, de sai, de Merce mon capduelh! E ges no pert son pretz fina lauzors, Si chauzimens li daura son escuelh, Que-l dieus d'amor a ben per dreit jutjat Que dona deu son amic enriquir. D'esser clamans me devet e-m destuelh, Ans grazirai si-m denha neys auzir Amors, que-m es capduelhs e guitz e tors, E-m pays tot jorn de pessamen onrat. De Joy Novelh me tenc be per paguat, No l'enguana de re lo miradors. Totz temps la vuelh onrar e obezir E car tener, e qui-s vol s'en janguelh. Lai on son tug li valen ajustat T'en vai, chansos, ves Anduza, de cors! E si-t vols far en bona cort grazir, Crida soven: Caslutz e Rocafuelh. |