prosody | miscellaneous |
Ab chantar me dei esbaudir De l'ira e del pessamen, Qu'estat ai en tal marrimen Qu'a pauc no m'an mort li sospir! Et agra.m mestier qu'ab merce Poques conquistar qualque re De que melhures ma razos E mos cors n'estes plus joyos. Mas ges no.s pot de me partir Us dezirs que.m lassa e.m pren, Que totz mos coratges m'enpen Vas selieys que.m pogra guerir! E, s'ilh non a de me merce, Pot saber que murai de se, Que tant es mos mals perilhos Que autres metges no m'es bos. Amiga, no.m vulhatz aucir, Que, si eu anc fis falhimen, Ves vos ieu m'en captenrai gen, Tot aissi cum auziretz dir! Qu'ades sui en vostra merce E vostres ai estat ancse! Vostr' om sui en totas sazos Et ades me reclam per vos. Dona, la nueg e.l jorn cossir De vostre gent cors avinen, Qu'en ren als non ai mon talen, Ni re mai sotz cel non dezir! Qu'aissi.m tenetz pres en merce, Que ges del cor non ai ab me: Pus me e.l cor avetz, amdos Gardatz, que.m sia quals que pros. Qu'ieu sui faitz al vostre servir Et al vostre comandamen, Que vos m'avetz fag de nien Et ieu deg vos o mout grazir -- Dona, per Dieu e per merce, Vos prec que.m fassatz qual que be, Que tant sui de vos cobeitos Que muer si no m'es faitz lo dos Senher N'Agot, totas sazos Estai vostre pretz fis e bos. |