home page ?


Longa sazon ai estat vas Amor
Humils e francs, et ai faich son coman
En tot qant puosc! et anc, per nuill affan
Q'ieu en sofris, ni per nuilla dolor
De lieis amar, no.n parti mon coratge,
A cui m'era rendutz de bon talen,
Tro q'ieu conuc en lieis un fol usatge
Ab qe.m dechai, e m'a camjat mon sen.

Agut m'aura per leial servidor,
Mas tant la vei adonar ad engan,
Per que s'amors no mi platz derenan,
Nim pot far ben que ja m'agues sabor --
E partrai m'en, c'aissi.m ven d'agradatge,
Puois ill se part de bon pretz eissamen,
Et er m'aillors tener autre viatge
On restaure so que m'a faich perden.

Ben sai, si.m part de lieis ni.m vir aillor,
Que no.i l'er greu ni non s'o ten a dan,
E si cuich eu saber e valer tan,
C'aissi cum suoill enanssar sa lauzor,
Li sabria percassar son dampnatge --
Pero lais m'en per mon dreich chausimen,
Car assatz fai qui de mal seignoratge
Si sap partir ni loignar bonamen.

En patz m'en part, mas qan cossir l'error
E.l dan c'ai pres e.l destric,lieis aman
Ni cum m'agra trobat ses cor truan
Qi.m feira ben e.m tengra en doussor
No.m puosc mudar que no.m sia salvatge,
Mas si.m conort, c'auzit ai dir soven,
C'ades pass' om primiers per lo follatge,
E pois taing ben c'om s'an reconoissen.

A, cum cuidiei fos dinz d'aital color
Cum aparec de foras per semblan
Et enaissi cum ill a beutat gran
E cum mais val gardes genseitz s'onor!
Et enaissi cum es de bel estatge
Agues en si mais de retenemen!
Et enaissi cum es d'ausor paratge
Contra son pretz temses far faillimen!

Ja non degra beutatz far son estatge
Ni remaner en dompna autramen,
Si non gardes s'onor e son paratge
E non agues en si retenemen.