| prosody | miscellaneous |
Si.m plagues tan chans Com sol, derenans Chantera, mas fre A.i que m'en rete! C'ar chans no m'es sals, Ans pert mos jornals Chantan, car quecs fui So que pretz adui E merma joi et avinen solatz On pert amors e pretz sas eretatz. Mas eu sec sos mans, Sia.m pros o dans, E n'ai mal e be E s'a.i dir de que Sui amics ni cals E can planh mos mals, Gart on ni a cui, Tan tem lo fol brui, E, can respon, gart que dic! car foldatz Es dicha leu, per qu'eu respon membratz. Mas sobretalans Forsa.ls ben-amans C'a penas s'en te Negus, per qu'eu cre N'escha dans mortals. E doncs non es fals, Qui met son esdui En trop gran refui! Pauc preza se e cilh a cui s'es datz, S'a descobert en ditz sas volontatz. Qui demand' a mans Dels cobes amans S'an domna, desse Diran: no, qu'ilh me Mas eu no sui tals, Ans dic que leials Amics sui de lui Et em par amdui! Car quecs a so c'a dos tanh ab tan patz Que.lh bocha ditz per c'om es encolpatz. Cel es drutz truans Que non es celans Sa domna ni se, Car sobr' altra re Deu gardar, sivals S'es amics corals, No.n gap ab altrui! Car se eis destrui, S'az altra part n'es del conselh privatz! Car ja non er per los altres celatz. |