home page ?


Amors,
E si.m clam de vos,
Sera.us onors
No, per ma fe,
Car no.s conve,
Desqu'en vostra mantenensa
M'aviatz,
Qu'era.m gecatz,
Ans pensatz
Com cela.m volha
Cui eu volh

S'acors
No.m fai, ve.us me jos!
C'una dolors,
Que.m sobreve,
Me vira.l fre
Vas leis, si noca l'agensa
C'om que.lh platz
Sia chazatz.
N'ai si.m fatz:
Can que m'acolha,
Pro m'acolh.

Folors
Fo ma sospeissos
C'a trop melhors.
No sofre re
Cudar de se!
Be fatz doncs fol'atendensa
Trop viatz
Me sui chamjatz!
No.n diatz
Qu'ela.s me tolha,
Qu'eu la.m tolh.

Pluzors
Vetz sui consiros
E.m pren paors
Qu'en pert l'ale,
Can me sove
C'a me falh e me comensa
Frevoltatz,
Que.m tolh solatz.
Grans pechatz
Er qu'eu me dolha,
S'eu m'en dolh.

E sors
Anc res que jois fos
Leu ni de cors
Egal ab me,
Qu'era.m n'ave,
En esmai etz en parvensa,
C'oblidatz
M'er soans fatz
N'er intratz,
Ans que.l rams folha
Port e.s folh

Era, can sui en Proensa,
Vau mesclatz
Entr'ir'e patz
E sapchatz
Del joi qu'i brolha
Quez eu brolh