| |
|||
| prosody | miscellaneous |
Ar auziretz Enchabalitz chantars! Qu'eu son amics enchabalitz e pars! -- Auiatz! E fon anc mais dicha Tan grans foli'en chantan? Greu n'eschaparai ses dan S'ab leis m'aparei ni m'ec Cui soi plus liies que sèrs. Terra, tu, co me sofèrs? A, tantas vetz M'a trag nesis parlar Joi d'entres mans, per qu'esdevenc liars! E·l cors, pois en ren s'aficha Don s'alegra tan ni qan, Volri'eu chantan gaban. Qu'era, tro que s'esperec, Tenia·l dreg per envèrs, Tant'er en amar esmèrs! E qu'en diretz Si l'ensiens es rars E·l cors es leus, valra·m is sobramars? -- Non ia! Tan es aut'e richa Cella -- c'als romaing'ab tan! -- Ja ren laus no m'i valran! Con c'ades qui cor essec, Mou mas cansos e mos vèrs Con fols de saber estèrs! Qu'anc nuls efretz No·m fon valenz ni cars Tro que m'ac, loing de Ioi, sobrareguars. -- E puois dic q'Amors me tricha Per un petit de semblan! E pert per so car non blan Leu parlar, c'us dan m'en crec Que·m ten plus greus que fèrs Per te bocha qe·n malmèrs! Qu'era no·m letz, Qan m'i valgra preiars, Querre merce? -- Si fai! Que mos trobars, Pos tan s'es m'amors africha C'autra non voill ni·n deman, Clama·l merce, qui que·l chan, A lleis cui deschauzir lec . --Fols trascuiatz e despèrs, Tot trobaras so que quèrs! -- E·l be que·t fetz, Si n'eras in fuoc ars, Potz li grazir? -- Fo doncs mas us baziars! -- Folla res! E sel que picha Non vai l'obra meilluran Cada pauc? -- Sabers d'enfan! -- E si·t fei mais qe non dec! Pieiers de cels de Bedèrs, Tu, cals merces l'en refèrs? -- Tals que lai dretz Los oillz on bat la mars, Qe·l cors es dous e francs e fis e clars De cellei cuis Iois abricha Long d'avol pretz e d'enian E de mi que vauc pensan Tan que magrezisc e sec, Volven de tort en travèrs, Plus abruzis d'un covèrs! E cuiatz setz M'enuei, ni deiunars, Ni·m tenga dan? Non fai! Que·l douz pensars M'aduri'ab una micha San e let al cap de l'an! -- Fols, c'as dig? Pauc t'en creiran De so c'anc vers non parec! -- Si fara ben, se l'enquèrs, Mos Lignaures, lai part Lèrs! Ioios, qui per bon endèrs No s'alegra, fols es mèrs! |
Metrical pattern: 754