| |
|||
| prosody | miscellaneous |
Ab semblan me fai dechazer Amors e.m dona marimen! Car semblan m'es del joi c'aten Que ja.l cor no.m n'esclaire, Car en trop ric repaire Bels semblans me guida Que.m ditz que jauzida N'aurai ses falhia. Mas so.m dechai, Don fort m'esmai, Car l'us semblans m'abriva lai E l'altre.m desvia. Ab bel semblan me fai voler Midons so que plus me defen! Ab art et ab fals genh me pren Com s'eu l'era trichaire. Per leis pert mo veiaire, Tan m'es abelida! Car on plus m'oblida Can ops me seria, Mos cors s'en vai Lai on li plai. Ses cor viu, car ab me no l'ai, Qu'ilh l'a en bailia Greu me poiria pro tener De s'amor ja segon mo sen, Pos aman no.i trop chauzimen Si com fizels amaire. Donc pos no.i gazanh gaire, Que non ai gequida L'amor que.m convida D'amar chascu dia Car no posc mai, Per c'amarai! Que be leu enquera n'aurai De joi a ma guia. Pos no posc mai, ab bon esper Aleujarai lo mal qu'eu sen! Fis serai ses tot jauzimen E gais per lo maltraire, Entro.m volha refaire Ma domna chauzida, Franch'et eissernida, De bela paria, Ab cui estai Jois ab cor gai, Ensenhamens ab pretz verai, Sens e cortezia. Domna.lh genser c'om pot vezer, Oimais me fossetz d'avinen! Que conoissetz mo fi talen E co.us am ses cor vaire Cortez'e de bon aire, S'un pauc m'etz aizida, Joios a ma vida Serai on qu'eu sia! Si no, be sai, Tan can viurai, Si tot no.m voletz, be.us volrai, Si tot no.m valia. Senher reis d'Arago, temer Vos devon vostre malvolen, Car fach lor avetz a prezen Totztems peitz lor afaire Quez om no sap retraire Si que n'es aunida Tota.lh lor partida E lor senhoria Mor e desvai! Tan an d'esglai Que.lh plus ric son tornat savai, Car lor pretz te via Coms, fort me plai, Car tan s'atrai Vostre noms vas fi pretz verai Qu'en re no.s desvia Ab joi t'en vai, Chansos, en lai Vas Mo-Senhor, ab cui estai Pretz e cortezia |