| |
|||
| prosody | miscellaneous |
Can brancha.l brondels e rama Per vergers e l'erba nais, M'es lo mati bel, can sona Lo rossinholetz els plais! C'altressi.m n'esvelh ab ora Com el e.n torn bautz e gais, C'anc no fui tan apensatz Que l'estatz Mais no m'aiudes assatz Que.l tems dezassazonatz. E can cest crid'e cel brama, L'us drech e l'altr'en biais, M'es aicela sazos bona! Qu'entrels valens e.ls savais Sortz jois, per que tals s'amora C'anc en invern mal no.n trais. Qu'eu eis que m'er'estranhatz De solatz, No.m senti tan, pos fui natz, Com fatz er', enamoratz. C'altressi.m son'e.m reclama, Com fetz los bous Bertalais, Amors e re plus no.m dona, Per que.m fer al cor esglais. E si no.lh platz que m'acora, No.n posc mais sofrir lo fais! C'us volers desmezuratz M'es doblatz Qu'er'am, si.m pez'o si.m platz, Tal don serai greu privatz. E pero res no m'afama Tan com s'amors ni no.m pais! Qu'el maltrach, que.m desazona, Magrezisc e pois engrais. E si saubes can ni cora N'aurai loc c'als precs m'eslais, Tot l'afan sofrir'en patz E sapchatz C'ab menhs m'en tengra paiatz Que vos no cudariatz. C'obs es c'amics que ben ama Prenda.l menhs e ponh el mais, E mentr'enquer ni razona, Semblara fols, si.s n'irais! C'avenir pot en tal ora Que.s n'an l'ir', e venra.l jais E pels respechs c'a donatz Totz forsatz, Tenra leu entre sos bratz So don plus era cochatz. Cudatz vos, qui trop se clama, Que sos jois plus no n'abais, E qui gran tort no perdona, Que sia fis ni verais Ai, Deus s'eu no fos, qui fora, Can per drech nien m'estrais Celeis cui m'er'autreiatz E.l bos fatz C'avi'aissi m'es chamjatz C'anc pois no fui ben amatz. Era, si.m laiss'en la flama Cel'a cui mo cor m'atrais, Can passei vas Eschalona, De pro m'er cregutz l'esmais E no.m valran una mora Sonet ni voltas ni lais! Ans me sui totz acordatz Que viatz Torn al mester dels letratz E.l chantars si'oblidatz Pero, domn', ab que sofratz E volhatz Mos precs e que.ls m'acolhatz, Tost m'er coratges chamjatz E vos, Tart-s'i-pres, sapchatz Qu'eu am, can vos guerreiatz |