| |
|||
| prosody | miscellaneous |
Be for'oimais drechs el tems gen, Pos la brav'aur'e·l frechs s'en vai, C'ab l'acors del termini gai Jovens, qu'es demechs mortz, cobrès E c'om l'acolhis e l'onrès! Que si jois mor, gran dol en ai, Can vei c'ab folha ni per flor No sortz ni cobr'en sa valor, E car s'esdui fians'e fés E cortz e bés, Per pauc en l'ira que m'en ve Totz fachs de solatz no·m rete. Mas ges a mo cor non aten Tan com auch precs c'us quecs m'en fai. C'anc mais o d'abril o de mai No fo que l'us no m'alegrès! Era m'es chascus plus engrès E pero si·m conortarai Ses alegrer e ses amor E no cut sapchatz chantador Que d'aital plach s'entremezés. E donc com és Qu'eu ses joi cut chantar e be Que totz bos chans sofr'e soste No pot esser, que ben o sen! Ans que m'en fenha no s'eschai Ja ses joi be no chantarai! Qu'enquera no cut c'om chantès Ses amor qu'el cor no·lh mostrès So que pois forses sen ab jai. Pero trobar e trobador Sonon de diversa color, Que tals cud'esser ben aprés Que no sap gés Com egals chauzimens conve Vas desmezur'e vas merce. Car ges segon lo chauzimen Trobars no leva ni dechai, Mas als francs coratges s'atrai Lo drechs sens e·l bos dichs après! Car qui per mo bo dir m'amès, Tot distra·lh que dich non aurai. C'ades a la bona sabor Serf la leng'al cor e l'acor E ren dels bes bonas mercés E del mal prés Mals gratz tot aissi com l'ave! Que si·m fer'eu vos e vos me. Vos sabetz ab cal jauzimen Foron amic fin e verai! Mas er'es tornad'en afrai Bon'amors, com que comensès, E cudava que·s melhurès, Mas ja mais non o cudarai! C'una mal'enfruneza cor, Don domnas e lor amador Son ochaizonat e mesprés Que, si·m legués, Eu eis cut qu'en distra tal re Qu'enemics li fora jasse. Car no quer drech de falhimen, Ai cen vetz perdut e perdrai, Ja pos non ai dich ni dirai So don cela s'endrechurès, Qui m'a·l tort e lo m'ac adès Per qu'eu so cre: no·m lauzarai De leis, c'ades la trop peior Plus que sers fai de mal senhor! Can l'a servit dos ans o trés E, desc'a més Tot so que pot, lui no·n sove, No l'ama ni·l preza ni·l cre. E si no fos que vauc temen Per so m'estortz, car m'en estrai Ja, si Deus me do tornar sai, No·m fora pros, si·lh demandès Merce, per so que la·i trobès Empero si·lh perdonarai Clamans e com a mal deutor C'om eschaen a trop melhor! Que·m valgra molt, s'a Deu plagués, Qu'ela·m parcés Tans tortz com eu l'ai fach ancse, Don ges enquera no·m recre. E si lai on fo mortz o prés Me conduissés, Sobre totz eu virera·l fre Vas lo senhor de Sanh-Sere. Qu'entrels Espas vai jois e ve E·i guid'e·i chabdel'e·i chapte. |
Metrical pattern: 696