| prosody | miscellaneous |
Amars, onrars e charteners, Umiliars et obezirs, Loncs merceiars e loncs grazirs, Long' atendens' e loncs espers Me degron far viur' ad onor, S'eu fos astrucs de bo senhor! Mas car no·m vir ni no·m biais, No vol Amors qu'eu sia gais. Pero mos sens e mos sabers E mos parlars e mos be-dirs, Mos esperars e mos sofrirs E mos celars e mos temers M'agron totztems onrat d'amor, S'eu perchasses mo ben alhor! Mas cilh que·m ten en greu pantais No vol qu'eu l'am ni que m'en lais. E si·lh plagues mos enquerers Ni mos preiars ni mos servirs, Ja·l trop velhars ni·l paucs dormirs Ni·lh mal qu'eu trac matis e sers No·m pogron ja partir de lor! Ans m'agra jois per servidor E ja no·m fora greus lo fais Ni·l mals c'al cor me brolh' e·m nais. Per qu'eu conosc e sai qu'es vers Que viure·m val menhs que morirs Pos que·lh sofranh jois e jauzirs E·m falh amors e sos poders Per qu'eu sospir e planh e plor Car jois no·m val ni no·m socor! Qu'eu sui aquel c'am melhs e mais E no manei ni tenh ni bais. Era·m combat sobrevolers E sobramars e loncs dezirs E fa·m chassar sobrenardirs E foleiars e no-devers So que no tanh a ma valor, E s'eu volh trop per ma folor, Mos sens en par alques savais! Mas eu remanh fis e verais. Car ma semblans' e mos parers E mos cudars e mos albirs M'an dich totztems c'altr' enriquirs Ni altr' onors ni altr' avers No·m podon dar tan de ricor Com cilh que·m fai viur' ab langor C'on plus languisc e dezengrais, Cut et aten c'a me s'abais. Domna valens, vostra valor E vostre pretz e vostr' onor Poiatz totztems e valetz mais, Per qu'eu vos sui fis e verais. |
Metrical pattern: 577u