| |
|||
| prosody | miscellaneous |
A l'onor Deu torn en mo chan, Don m'era lonhatz e partitz, E no m'i torna brais ni critz D'auzels ni folha de verjan Ni ges no m'esjau en chantan, Ans sui corossos e marritz! Qu'en mans escritz Conosc e vei C'apodera pechatz, Per que falh fes e sortz enequitatz. E consir me meravilhan Com s'es lo segles endormitz E com be.n secha la raitz E.l mals s'abriv'e vai poian! Qu'er'a penas prez'om ni blan, Si Deus es antatz ni laiditz, C'als Arabitz Trafas ses lei Rema Suri'en patz, E sai tenson entr'els las poestatz E pero ges no m'es semblan C'om valens d'armas ni arditz, Pos a tal coch'er Deu falhitz, Ja ses vergonha.lh torn denan! Mas cel c'aura pretz de so bran, De grans colps e dels seus feritz Er acolhitz Si de so rei Que.s tenra per paiatz, Qu'el non es ges de donar issaratz. E pos a cor de bo talan Dona poder Sanhs Esperitz, Eslonh a que no si'aizitz De doble trafa ple d'engan Esquivan cels c'ab Deu iran C'us de sa forsa no s'iritz! C'a penas vitz Per gran desrei De vairas volontatz Grans jauzimens venir ni de mans latz. Mas desque segon tuch un ban E chascus vol esser grazitz, Qui mais pot, plus si'afortitz! C'aissi sapchan que venseran, E cilh s'aiuden que no.i van Per que Deus sia melhs servitz Pero si ditz C'us quecs amnei So qu'el mon plus li platz, El sega nutz, qu'el nos rems despolhatz Ai chaitiva gens que diran, Can el remembrara.ls oblitz E volra comte dels pentitz, Cels qu'era no l'aiudaran Veiretz be que razo rendran De can que.ls ai'ensenhoritz! E ja lor guitz, Fe que vos dei, Que.ls auran mal guidatz, No lor faran ni conort ni solatz. Be sapchatz que.m peza del dan, Mas per l'anta.n sui esbaitz Que.lh trafanet menut mestitz, Que Deu ni lei ni be non an, Fassan sobre nos so que fan! Que lach nos an envilanitz C'anc non auzitz En tal agrei Del tems que Deus fo natz Tan gran perilh que tan leu fos portatz Pero si vauc solatz cobran Que m'era lonhatz e ganditz, E mos vers es en joi fenitz Qu'era comensatz en ploran, Desque las ostz chavaucharan E.l socors dels reis es plevitz. Mal er balhitz, So vos autrei, Soudas et amiratz, Can ilh venran, si no s'es deslonhatz. E.l coms Richartz es be garnitz! C'als seus aitz, Qui que.l n'envei, S'es tals afars mesclatz Que ben es grans, e sia.n Deus lauzatz |