| |
|||
| prosody | miscellaneous |
Mot era dous e plazens Lo temps gays cant fon eslitz Paraties, et establitz; Qe.ls drechuriers conoisens Lials, francx, de ric coratie, Plazens, larcx, de bona fe, Vertadiers, de gran merce Establi hom de paratie, Per cui fo servirs trobatz, Cortz e domneis e donars, Amors e totz benestars D'onor e de gran drechura. E paraties e bos sens Deu esser capdels e guitz De totz aures bes complitz; Per que las premieiras gens Donero al ric linhatie Rendas, que tenguesso be Zo c'a paratie cove. E doncx, qui ten l'eretatie Ni.l fieu, don el es cazatz, No serf, com vol esser pars Als pros, mas tot l'es pezars A far so don pretz melhura? E doncx hom fals maldizens, Periurs, avars, deschausitz, Desconoisens, apostitz, Pos renh'ab gualiamens, Lauzengiers e ples d'otratie, Pos tot paratie mescre, Be volgra saber per que Vol aver nul senhoratie, Mas non conois don fon natz. Car bos pretz es aitan cars Que no.l sap conprar avars, Mas l'autruj ben-fach rancura. E de donas eysamens Fon ia lur bos pretz auzitz Per tot lo mon e grasitz, E fasion honoramens Ab cor de gran vassalatie. E.l forlinhars per iasse A so tornat a non-re. E teno s'a nessiatie Qui lur vol esser privatz, Mas fals mal-dirs e guabars Lor platz, e suau parlars Ab selas de lur mezura. E sil ab los fers luzens, De l'autruj dreit enrequitz, Qui viran tost la cervitz La on tanh aculhimens, Son vila per pla uzatie, E totz hom pros que.ls mante Ahunis parati'e se. E, si tot no m'es salvatie, Car ab lor no.m soy molhatz De la plueia que s'espars, No.m platz lor vilaneiars, Don ilh me fan car'escura! |