| |
|||
| prosody | miscellaneous |
Per solatz revelhar, Que s'es trop endormitz, E per pretz, qu'es faiditz, Acolhir e tornar, Me cudei trebalhar! Mas er m'en sui gequitz Per so m'en sui falhitz, Car non es d'achabar! C'on plus m'en ve volontatz e talans, Plus creis de lai lo destorbers e.l dans. Greu es de sofertar! A vos o dic c'auzitz Com era jois grazitz E tuch li benestar. Mais no podetz jurar Qu'egas de fust no vitz Ni vilas, velhs, fronitz Esters grat chavalgar. Lachs es l'afars e fers e malestans, Don om pert Deu e rema malanans Vos vitz torneis mandar E segre.ls gen garnitz E pois dels melhs feritz Una sazo parlar! Er'es pretz de raubar E d'ebranchar berbitz. Chavalers si'aunitz Que.s met en domneiar, Pos que tocha dels mas moltos belans Ni que rauba gleizas ni viandans E vitz per cortz anar De joglaretz formitz Gen chaussatz e vestitz Sol per domnas lauzar! Er no n'auzem parlar, Tan es lor pretz delitz - Don es lo tortz issitz D'elas malrazonar No sai. - de cals, d'elas o dels amans Eu dic de totz, que.l pretz n'a trach l'engans On son gandit joglar Que vitz gen acolhitz C'a tal a mester guitz Que solia guidar, E pero ses reptar Vai er tals escharitz, Pos fo bos pretz falhitz, Que solia menar De companhos, e no sai dire cans, Gen en arnes e bels e benestans. "../"Qu'eu eis que solh sonar Totz pros, om eissernitz, Estauc tan esbaitz Que no.m sai conselhar! Qu'en loc de solassar Auch er'en cortz los critz C'aitan leu s'er grazitz De l'aucha de Bretmar Lo comtes entre lor com us bos chans Dels rics afars e dels tems e dels ans. Mas a cor afranchar, Que s'es trop enduritz, No deu om los oblitz Ni.ls velhs fachs remembrar Que mals es a laissar Afars, pos es plevitz, E.l mal don sui garitz No.m chal ja mezinar! Mas so c'om ve, volv'e vir e balans E prend'e lais e forse d'ams los pans D'aitan me posc vanar C'anc mos ostals petitz No fo d'els envazitz! Que.l vei per totz doptar Ni no.m fetz mas onrar Lo volpils ni l'arditz, Don mos Senher chauzitz Se deuria pensar Que no l'es ges pretz ni laus ni bobans Qu'eu, que.m laus d'els, sia de lui clamans. Era no m'ais per que no m'o demans! Car planchs sera, s'aissi rema mos chans. So di.l Dalfis que conois los bos chans. |