| |
|||
| prosody | miscellaneous |
No.s pot sofrir ma lenga qu'ilh no dia So que mo cor li dai en mandazo! Car lo cor fai a guia de baro, Qu'en comanda a los membres tot dia. E per so, si tals dichs non es vezis A cortezia, be mi par devis Que la lenga s'escus per senhoria, Car es del cor ancela ses bauzia. Lo segle s'es chamjatz de cortezia En vilanatges et en perdizo! Plus es lauzatz qui tot tol a bando Que cel que dona per sa manentia C'ardis lo crois sordeiors e mesquis L'us aib l'altre. tals e tals vai rapis Pel seu donar, e per sa trufardia Gardem nos be d'aital poestaria Donc non a locs so que sol Pauls aprendre Que dizia en son escrit aissi: Plus es lauzatz qui don'al seu vezi Que cel que pren, qu'er sol franqueza vendre, Ni no conselh de mandar jutjador Cal sia melhs e de maior lauzor, Prendre o dar! car li croi volran rendre Garentia: no val tan dar com prendre. E si li bo volran lor drech defendre Contra los crois, ni lo ser ni.l mati No.l poiran far, si com pens dins de mi, Car trop es fortz lor tortz per escoissendre. Car per un bo son cen li sordeior, Donc qu'en valgra la garentia lor Contra los crois, cuis chaps poscha Deus fendre Pauc o nien, so posc per drech entendre. E pos li bo perdut an la poissansa E.lh savai croi e.lh janglos lauzenger Tolguda l'an ab fel cor brau e fer, Qu'i faran ilh, si Deus no fai venjansa Remarran ilh de proar lor talan No.l lor conselh, si Deus mi do bon an Melhs am be far ses aver nulh'onransa Qu'esser prezatz ab malvaia bombansa. Car eu am mais, de bo cor ses enfansa, Esser anheus en prat oz en verger Que lops ni ors, si tot ai consirer D'esser trenchatz o d'aver greu pezansa. Car qui mor bos, sivals gazanha tan Quez apres se Deus lo vai onoran, E laissa rics sos filhs de sa nomansa! El mon non es rictatz de tal engansa Amics Bertrans, qui etz conoissens tan, Paucs en conosc c'ab vos valhon un gan. Conortatz vos qui avetz ses doptansa Rics pretz conquis tenhatz lo en membransa |