| |
|||
| prosody | miscellaneous |
Si per mo Sobre-Totz no fos, Que ditz com chan e sia gais, Ja.l suaus tems, can l'erba nais, Ni pratz ni rams ni boscs ni flors Ni durs senher ni van'amors No.m poirian metr'en eslais Mas d'aisso.m tenh ab lui Que, pos jois falh e fui, Merma pretz e barnatz, E, pos las poestatz S'estranheron de jai, De can que.l peier fai, No fo per me lauzatz - C'aissi.m sui conselhatz Que nulh ric non envei - Qui trop mal senhorei. Cela vetz era.l segles bos, Can per tot er'acolhitz jais E cel grazitz cui n'era.l mais E pretz s'aveni'e ricors. Qu'er'apel'om pros los peiors E sobra cel que peitz s'irais E cel que mais adui, C'onques pot, de l'altrui, Sera plus enveiatz. De que.m tenh per forsatz C'om d'avol plach savai Colha bo pretz verai, Don degr'esser blasmatz! E vos car no pensatz Si.s tanh c'om pretz autrei Celui que lach felnei Mal fo chabdelada razos, Desc'om per pros tenc los savais, E.ls francs e.ls cortes e.ls verais Razonet om per sordeiors, E moc la colpa dels alsors, Can devers becilhet ni frais. Qu'era no sai per cui Tol om l'onor celui Que n'er'a drech chazatz, E si.ls en corelhatz, Diran que be n'estai! Car cel qu'eu no dirai Sera melher amatz, E pois, si.us embargatz De pretz ni de domnei, Mes avetz el conrei Eu vi c'om prezava chansos E que plazian tresc e lais. Era vei que, pos om s'estrais De solatz ni de fachs gensors Ni l'afars dels fis amadors Se viret de drech en biais, Que totz devers defui. Que ges, s'om se deblui Las charns ni.ls vis ni.ls blatz En fol acompanhatz, A pretz non o tenrai - Ni crezutz no.n serai - E no.m segra.l perchatz! Que lai val pauc rictatz Qui la men'a desrei Ni drech no.i sec ni lei Er'auch del rei qu'era plus pros E plus valens en mans assais De totz cels que vianda pais, Que sobret mejas e maiors E crec sos pretz e sas onors E no temi'afan ni fais, Que, si lo planhon dui, Lo tertz lor o destrui, Que.m par mal ensenhatz. Qu'eu no cut c'anc fos natz, De Charlemanh'en sai, Reis per tan bel assai Mentaugutz ni prezatz! Mas ja leu no crezatz C'afars tan mal estei Qu'ensems lo planhan trei E que val donc bela faissos Ni grans poders c'aissi s'abais E ja passava part Roais Lo noms e.l pretz e la paors Entrels paias galiadors, C'anc us sols plus arer no.ls trais Per que falh qui.s desdui, Pos aissi leu s'esdui So c'om plus vol ni.lh platz, De que tenh per grevatz Cels que mais podon sai, Si non adoban lai, Can chamjara rictatz, C'aian cal que solatz De lor gran charlabei Denan lo maior rei. Que.l trafas segles enoios Dona pretz celh que plus atrais, Sonh non a mas que.l cors s'engrais E fassa, c'onques pot, so cors E l'arma pert ses lo socors De lui cui sos convens enfrais! C'us tan gen no s'estui Ni no.s serra ni.s clui De bels murs batalhatz, Can sera lai passatz Al port on no s'eschai C'om merme son esmai, Totz no si'enserratz. Per qu'es conselhs senatz C'om de sai se chastei Que sos tortz lai no.l grei. Lui prec, qu'es sols clamatz Us Deus e Trinitatz, Que.m gart qu'eu no folei Sai tan que lai me grei. E chascus lo cor tei Que sos tortz lai no.l grei |