| |
|||
| prosody | miscellaneous |
Del tot vey remaner valor, Qu'om no·s n'entremet sai ni lai, Ni non penson de nulh ben sai, Ni an lur cor mas en laor. E meron mal clerc e prezicador, Quar devedon so qu'az els no·s cove, Que hom per pretz non do ni fassa be. E hom que pretz ni do met en soan, Ges de bon loc no·l mou, al mieu semblan. Quar Dieus vol pretz e vol lauzor, E Dieus fo vers hom, qu'ieu o sai, E hom que vas Dieu res desfai, E Dieus l'a fait aitan d'onor Qu'al sieu semblan l'a fag ric e maior E pres de si mais de neguna re, Doncx ben es fols totz hom que car no·s te: E que fassa en aquest segle tan Que sai e lai n'aya grat, on que·s n'an. Ar se son fait enqueredor E jutjon aissi com lur plai. Pero l'enquerre no·m desplai, Anz me plai que casson error E qu'ab bels digz plazentiers ses yror, Torno·ls erratz desviatz en la fe, E qui·s penet que truep bona merce, E enaissi menon dreg lo gazan Que tort ni dreg no perdan so que y an. Enquer dizon mais de folor Qu'aurfres a dompnas non s'eschai. Pero si dompna piegz no fai, No·n leva erguelh ni ricor, Per gent tener no pert Dieu ni s'amor. Ni ja nulhs hom, s'elh estiers be·s capte, Per gen tener ab Dieu no·s dezave! Ni ja per draps negres ni per floc blan No conquerran ilh Dieu, s'alre no y fan. Tug laisson per Nostre Senhor Nostre clerc lo segle savai, E no pessan mas quan de lai. Aissi·ls guart Dieus de dezonor Cum elhs non an ni erguelh ni ricor, Ni cobeytatz no·ls enguana ni·ls te, Ni no volon re de so qu'hom bel ve! Res no volon, pero ab tot s'en van, Pueys prezon pauc qui ques i aya dan. Sirventes, vay al pro comte dese De Toloza! membre·l que fag li an E guart se d'elhs d'esta ora enan. |
Metrical pattern: 504g