prosody | miscellaneous |
A Lunel lutz una luna luzens Qe dona lum sobre totas lugors! D'aqui pren lum jois, dompneis ez amors E gais solatz e beutatz e jovens. E qan le lums pres a Lunel luzensa, Q'enlumina daus Tolsa part Proensa, Estavan jois e dompneis tenebros, Mas ara-ls fai Lunels luzir amdos. Le noms del lum es clars e resplendens, Q'aitan vol dir als bos entendedors Gauseranda com gai seran e sors Cill qui veiran sos gais captenemens, E qe jois er donatz cui ill agensa, E qe jauzen seran de gran jauzensa Ella e cill qe volra far joios: Vers es le noms, qui be l'enten, e bos. Guirautz Amics, li savi de Proensa Diga-m del nom, si-ls platz, lor entendensa, Qar si-n dizon miellz, eu no-n sui gilos, Tan vuelh del nom qe vailla sobre-ls bos. |