| |
|||
| prosody | miscellaneous |
On mais a hom de valensa, Mielhs si deuria chauzir No fezes desconoyssenssa. Quar hom pros leu pot falhir, E-l malvatz, al mieu albir, No falh, quan fai falhimen, Quar per dever yssamen Fan li malvat malestan Com fan bos fagz li prezan. Ges dels valens no m'agensa Quan n'aug als malvatz mal dir, Qu'ilh cujon la lur falhensa Ab los lur mals digz cubrir! E da lor Dieus a culhir Quad'an pro vi e fromen E an pro aur e argen! E ja re-n be no metran Ans valon meyns on mais an. Dieus, com pot aver sufrensa Ricx hom de gent aculhir Ni de far guaya parvensa Ni co-s pot de dar tenir Quan ben o pot mantenir Mout hi fetz Dieus son talen, Quar non donet largamen A sels que largamen dan E pauc a sels que pauc fan. Mas ja melhur'om e gensa En raubas e en guarnir E en manhta captenensa, E-s vol hom trop gent tenir. Mas en dar ni en servir No vei far melhuramen. E doncx que-us faretz, manen Ja morretz vos, can que can! Gardatz que-l temps no-us engan. Coms Cumenges, ses temensa, Poiri'om a vos venir, Que-l sobrenoms es guirensa De vos, qui-l sap devezir, Don paubre-s deu enriquir. Qu'aissi com crezon crezen En cumenjar salvamen, Deu Cumenges valer tan Que salv aquels que-l creiran. Emperaire, pretz valen Avetz, e valor e sen, E quar sabetz valer tan En vos vuelh daurar mon chan. Na Guiza, ges no-m repen De vos lauzar, quar m'es gen! Mas dels vostres tan ni quan No-m laus, s'enquer mielhs no-m fan. |