home page ?


No sap per que va son joy pus tarzan,
Ni fug ni gan
Dompn'a son amador,
Pus lo conoys be per bo servidor
Senes error
En fag et en semblan.
Quar trop tarzar en dompney es follia,
Que mans amicx ne ven en dezesper,
Quar pueys no-s deu dompna de ren temer,
Pus ve l'amor ses fench'e ses bauzia.

Bona dompna, ab bel cors benestan,
Vos tray enan
Beutatz part la gensor,
E-us fai valer valors part la melhor.
Pro-us fan d'onor,
Per so faitz lur coman:
Valors vos ditz que fassatz ben tot dia,
Et amors vol qu'ametz, non per dever,
Mas lo plus fi, ab qu'aya meyns poder:
Qu'on meyns er ricx, mais vos o graziria.

Triat vos ai, dompna, mi ses enjan,
De bon talan,
Que ben gar vostr'onor,
Si cum triet si ad emperador
Senes temor
Ja Fredericx antan:
Si eis s'i mes, quar hom tan no y valia.
Atressi-us dic qu'om mi no y pot valer,
Quar res, dompna, tan no-us ama per ver!
Per so-us valh mais ieu qu'autre no faria.

Ben pot chauzir dompn'un sol fin aman
Ses malestan,
Son par o pauc major!
Pero no falh, si chauzis en menor,
Si-l ve valor
Sol non pes lo baran!
Quar lo plus bas li grazis tota via,
Mais que-l plus ricx ni-l pars, si-l fa plazer,
Per que-l deu mielhs dompn'ab si retener
Quar mais i a poder e senhoria.

Per ver vos jur, dompna, e-us pliu e-us man,
Qu'ieu non am tan
Ren cum vos, cuy honor!
Per que-n laissi mans bels plazers d'alhor.
Pro y fas folor,
Mas be-m podetz aitan,
O neis cen tans esmendar, si-us plazia!
Pero ueymais vos deuria plazer.
Per que no-us platz, dompna qu'ieu fas saber
Qu'atressi-us er a far, coras que sia.

N'Esclarmunda, vostre noms signifia
Que vos donatz clardat al mon per ver
Et etz monda, que no fes non dever!
Aitals etz plan com al ric nom tanhia.