home page ?


Li mey dezir
E li mey pensamen,
Li dous talen
E tug li mey cossir,
Mos gaugz, mos bes,
Mos thezaurs e m'amors,
E ma valors
E-l bes que m'es promes
Etz, dona, vos,
Qu'als non ai retengut
En aquest mon
Qu'als majors ops mi tenha jauzion,
Mas sol de vos, cuy ai mon cor rendut,
Cuy am e lau e tem e ser e blandi.

E quan m'albir
Del vostre cors plazen,
Gay, avinen,
Los bes, qu'ieu no sai dir,
Cum es cortes
Ni quals es vostr' onors
E la ricors,
Adoncs consir e pes--
Tan suy joyos--
Que be m'es avengut,
Don'ab pel blon,
Quar tan vos am ni n'ai cor deziron
Del gensor cors qu'om sap vestit ni nut!
Doncs ben suy folhs s'autra-n quer ni-n demandi.

E pus chauzir
Me fes Amors tan gen,
Per chauzimen
No-m vulhatz far murir,
Qu'estranhs dols es
E salvatja dolors
E greus clamors,
Qui pert los ans e-ls mes
E reman blos
Del lonc joy atendut,
Quan no sap don
Aja mais be, tan l'eis del cor prion
Sa grans dolors, quar si eis a perdut.
Cest' ira tem, mas alhors la comandi.

Qu'ieu-s puesc plevir
Plus vos am leyalmen
Ab sufrimen
Que-l maritz ab jauzir!
Doncs, francha res,
Un dels cent bes majors
O dels menors
Volguessetz qu'ieu n'agues
Qu'us angoyssos
Dezirs m'a si vencut
Que-l cor me fon
De l'enveya que m'auci e-m cofon,
Quar ieu non ai amic que m'en ajut,
Mas sol de vos, qu'autra no-n prec ni-n mandi.

E doncs, si-m vir
Vas lo bon rey valen,
De pretz manen,
De Castella, no-us tir,
Car el a pres
Sobre-ls emperadors
E-ls reys forsors
E-ls princeps e-ls marques
Los pretz e-ls dos,
Qu'aissi-s perdon vencut,
Cum mars rescon
Los noms dels flums, tug l'autre pretz que son,
Lai on del sieu a sol ges mentaugut,
Per qu'ieu noy falh si-l retrac ni l'espandi.

E sal lo Dieus ad onor e l'ajut,
Quar es vas pretz tals quo-l vuelh ni-l demandi.