prosody | miscellaneous |
Entre mon cor e me e mon saber Si moc tenzos, l'autra nuiz, qe-m dormia, Del faillimen don si plaingnon l'aman: Qu'eu dizia q'en lur colp'esdeve E mos cors ditz: seingnor, ges eu no-l cre! Anz es amors cel qui fai tot l'engan. E-l sens carget las domnas de faillia! Et enaissi tenzonem tro al dia. Mos cors levet et dis: e-us voill querer, Seingnor, si-us platz, perdon qu'eu primers dia. Se cel qi fail agues lo dol e-l dan, Tot l'agr'amors, c'aitan mal si capte, Qu'el destreing l'un e laiss'a l'autre-l fre, E l'un te sors, l'autre carga d'afan, E fui als pros, e-il fals n'an manentia: Ara iutiaz si res piegtz far poiria. Et eu, seingnor, en dirai mo voler, --Zo dis mos senz--, qu'eu crei que-il failla sia De las domnas, car si fan pregar tan. Es er tals us qe can la dompna ve Qui ben la prec, ia mais no-ill volra be! Pois prega tal qu'ela non vi pregan! Mas eu tengra plus bella cortezia Si de cellui qi l'ames fos amia. Senz, vos e-l cor failletz, al mieu parer, Qe-l faillimenz mou totz de leuiaria Dels amadors, qui son fals e chanjan, E car domnas i trobon pauc de fe, Si fan preiar et longnon lur merce Per conoisser lo leial del truan! E quan trobon amic senz tricharia Li fan amor, si com a faig la mia. Ab tan mi fon venguda per vezer, So-m fon senblan, madonna que-m disia: Bels douz amics, eu vos ren merce gran De la honor qu'aves faicha per me A las dompnas, e non failletz de re. Si-l drut fosson tal can vos, ia blasman Non s'anera negus de drudaria, Mas savis iau e-l fols beu sa follia. Domna, merces, quar m'aves onrat tan! Vostre sui eu e serai a ma via, E-m lau de vos, qi que-s plaingna d'amia. |