prosody | miscellaneous |
Segne'n Lafranc, tant m'a sobrat amors Q'ieu non conosc lo mal dal be q'ieu n'ai! Car lo maltraigz m'es tan douza sabors, Qe-l gaugz ni-l bes no-m ten pro quant ieu l'ai: Per q'ieu conosc q'a murir m'er, zo sai, Ni no-m partrai, tant son fizels amaire, Qar cil qi m'a del tot el sieu poder Mi mostr'orgueil e fai non da dever, Mas trop me fai pero dol e mal traire. Amics Symon, celui sobra follors, Qi apella maltraig zo que li plai, E qi non cern los gaugz de las dolors! Non sai per qe-il venguesson d'amor iai. Car non grazis lo ben cui non desplai Lo mals, e qi d'aisso non es triaire, Ia no-il deu far domna d'amor plazer, Pos non conois lo gaug dal desplazer: No-l dic per vos, car no-us voil irat faire. Segne'n Lafranc, ben cuidava de vos Conseil trobar, mas ia mais no-l qerrai Q'enemics es de totz los amoros Et anc no-us plac azautamentz de lai Don movon tuig bon faig cortes e gai! Car si fosses d'amor pres pauc ni gaire, Ia de triar non agratz tal poder Qom mi dissetz! mas qar a non chaler Avetz gitat amor, no m'es confraire. Amics Simon, totz los amanz ioios Hai eu amatz totz temps e amarai E sui dels lur faillimenz doloros. E per aizo vos dic zo qe-us desplai, Qar diziatz zo q'a dir non s'eschai: Don corossat vos vei al mieu veiaire. Ma una ren vos voil ieu far saber, Si-m voliatz d'amor conseil qerer: Se-us volgues mal, si-us for'ieu conseillaire Segne'n Lafranc, non sui ges corrossos Pels vostres digz, mas quar ab cor verai Amei tos temps mal grat dels enoios E sui amatz et am et amarai. Feunei qar vei, si tot amors m'atrai Gaug e plazers e-m ten el sieu repaire, Q'ieu muer! e-us dic q'ieu non puesc ben aver, S'eu non remir mi donz matin e ser, E s'ieu follei, ben lo puesc ieu retraire. Ja non degratz esser tan cossiros, Pos fin'amors tant grant honor vos fai, Qe ben amatz es mal grat dels gelos. Amics Symon, e qe demandatz mai Mas ieu sai ben per ver e si-l dirai, Car vos l'amatz et ill vos ses cor vaire E non podetz soven aver lezer Del sieu bel cors embrassar e tener! Doncs, si-us doletz, no me-n meravil gaire. Segne'n Lafranc, ieu viu en bon esper, Car hai chauzit del mon la debonaire. Amics Symon, penzatz de-l retener, Qe pron avetz conqist, al mieu veiaire. |