prosody | miscellaneous |
Raimon robin, eu vei que Dieus comenza De tornar nos en nostra antiga siza, Que tota gen nos ai'en reverenza E terr'e mar menem a nostra guiza! E trobarets la paraula veraia Que-us dis antan, qu'oimais aurem saison, E vostr'orgoill la perd! de qe sap bon A totas genz, ni En Deu s'en apaia. Da Dieu nos ven, Raimon, per ma crezenza, E ben i fa, car el vol far iustiza De vostr'orgoill que tan li desagenza, E que tornez lai del Ron en camiza, E no vestatz vert, ni vermeill, ni saia, Q'a ver orgoil desavinen, fellon Parlavats grais cais si tocses lo tron! Mas vostr'orgueills coven oimais que chaia. Raimon robin, en vos non vei guirenza, Si no-us metes del tot en la devisa De los Frances, com son cil de Proenssa: Pois seres sers e per chaut e per biza. O si voles hom de vos merce aia Trametez sai de vostres bezanz pron! No-us senble sel c'autra vegada fon: En Uc, lo sart, o sap qui fei la paia. Segur podetz estar tota sazon, Car la veilla, don vos sabetz c'om fon, Vos guida sai per son drut: tan s'en paia. |