prosody | miscellaneous |
Gloriosa sainta Maria, Eu-s prec e-us clam merce que-us plaia Lo chanz que mos cors vos presenta! E s'anc iorn chantei de follia Ni fis coblas d'amor savaia, Ar vueill virar tota m'ententa E chantar de vostr'amor fina, Que autr'amors no vueill que-m vensa, Qu'anc no-i trobei ioi mas pezansa. Mais la vostra sai qu'es mezina De totz los mals, per que m'agensa Metr'en vos tota m'esperansa. Qui de l'amor del mont follia Es nafratz d'una mortal plaia, Per qu'es fols cel que-s n'atalenta! Mas cel que vostr'amors chastia, No-ill faillira que ioi non aia, E non er mals que de mal senta. E car eu sui poingz de l'espina Del mon, veing a vos per guirensa, Que-m sanes per vostra pidansa E que-m fassas, dousa reina, Mon cor e tota m'entendensa Pausar en vostra fin'amansa. Pensan que-us ai per leviaria Mesfaig, et es dregz que-m desplaia E qu'eu de bon cor me-n repenta! E si merces no m'es amia, Tot mon afar tem que dechaia, Que razos fort me n'espaventa, Qi no m'es parens ni vezina, Ans m'es a dan per ma faillensa, E vei que m'adutz desfiansa, Si vostra merces no-s declina Vas me e no-m fai mantenensa: Et eu en aiso ai fiansa. Sol que vostra merces mi sia Aiudaritz, dretz no m'esmaia, Ni blan razon ni s'aparenta. Demergutz sui que dretz m'aucia, Mas vostra merces me-n estraia E ia ma mort non li consenta. Pos cel, cui sels e terr'aclina, Pres del vostre bel cors naissenssa E-s noiric ab vos en enfansa, Preiatz sa maiestat divina Qu'aia merce e sovinensa Al iutiar et oblit veniansa. |