| |
|||
| prosody | miscellaneous |
Amics Rubaut, de leis, q'am ses bauzia, Vos dirai coissi-m vai: Qe qant mi ve, ela-m ri tota via, Mas autre be no-m fai! Non sai si men'eschern o iai. Vos qe-n cuidatz fai o per tricharia, O qar li plai m'amors e ma paria Segne'n Lafranc, pos voletz q'eu vos dia Mon semblan, vos dirai: Cella q'amatz crei q'a cor qe-us aucia Pos null ioi vos atrai, Q'ab ris vos trahis e-us dechai, Com fetz baizan Juda Dieu, ses faillia, E si-m desplai q'ill es vostr'enemia. Amics Rubaut, se midonz aitals era Com cella qi-us trahi, Zo qe dizes ges non desconfessera Qe non fos enaissi! Mas ab leial cor e pretz fi Regna midonz, per q'ieu non autregera, Pos ela-m ri, qe-m fos falsa ni fera. Segne'n Lafranc, savis hom non lauzera Zo qe lauzatz aici, Qar ia domna q'ames tant non celera Son cor a son ami! Mas per o qar vos faitz ieu ri Non crei qe-us am, ni ieu non lo prezera Qi-l fez a mi, anz m'en desesperera. Rubaut, ris nais de ioi e d'alegranza E d'amoros talen, Et es del cor veraia demostranza Q'el veia ren plazen! Doncs si-m garda midonz rizen, No-m pot d'amor far plus bella semblanza, Et eu o pren enaissi, ses doptanza. Segne'n Lafranc, no-us puesc gitar d'erranza, Tant amatz follamen, Car vos prenetz ris en luec d'amistanza! Mas ieu no-m n'atalen, Qe badars mi don'espaven. Vos atendretz vostra bona esperanza, Mas ieu enten que-us er desesperanza. Rubaut, apres lo ris aten Q'eu aurai ioi de leis e benananza, Qar non desmen ma domna sa semblanza. Lafranc, si del ris bes vos ven Ben poiretz dir q'aventura-us enanza: Pero rizen gab'om los fols en Franza. |